Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 13.9 | Dem. 13.11 (English) | >>Dem. 13.14 |
13.10ὃ δέ μοι πλείστην ἀθυμίαν παρέσχεν ἁπάντων , ἐρῶ πρὸς ὑμᾶς καὶ οὐκ ἀποκρύψομαι , ὅτι πολλῶν καὶ μεγάλων καὶ καλῶν ὄντων τούτων ἁπάντων , τῶν μὲν ἄλλων οὐδενὸς οὐδεὶς μέμνηται , τοῖν δυοῖν δʼ ὀβολοῖν ἅπαντες . καίτοι τοὺς μὲν οὐκ ἔστι πλείονος ἢ δυοῖν ὀβολοῖν ἀξίους εἶναι , τἄλλα δὲ μετὰ τούτων ὧν εἶπον τῶν βασιλέως ἄξιʼ ἐστὶ χρημάτων , πόλιν τοσούτους ὁπλίτας ἔχουσαν καὶ τριήρεις καὶ ἵππους καὶ χρημάτων πρόσοδον συντετάχθαι καὶ παρεσκευάσθαι .
τί οὖν ταῦτα νῦν , φαίη τις ἄν , λέγω ; ὅτι φημὶ δεῖν ὑμᾶς , ἐπειδὴ τὸ μὲν πάντας μισθοφορεῖν δυσχεραίνουσί τινες , τὸ δὲ συνταχθῆναι καὶ παρασκευασθῆναι παρὰ πάντων χρήσιμον εἶναι δοκιμάζεται , ἐντεῦθεν ἄρξασθαι τοῦ πράγματος , καὶ προθεῖναι περὶ τούτων τῷ βουλομένῳ γνώμην ἀποφήνασθαι . ὡς οὕτως ἔχει · ἂν μὲν ὑμεῖς νῦν πεισθῆτε τούτων καιρὸν εἶναι , ὅταν αὐτῶν εἰς χρείαν ἔλθητε , ἕτοιμʼ ὑπάρξει · ἂν δʼ ἀκαιρίαν ἡγησάμενοι παρίδητε , ὅταν δέῃ χρῆσθαι , τότʼ ἀναγκασθήσεσθε παρασκευάζεσθαι .
ἤδη δέ τις εἶπεν ὦ ἄνδρες Ἀθηναῖοί που λέγων , οὐχ ὑμῶν τῶν πολλῶν , ἀλλὰ τῶν διαρρηγνυμένων εἰ ταῦτα γενήσεται , “τί δʼ ὑμῖν ἐκ τῶν Δημοσθένους λόγων ἀγαθὸν γέγονεν ; παρελθὼν ὑμῶν , ὅταν αὐτῷ δόξῃ , ἐνέπλησε τὰ ὦτα λόγων , καὶ διέσυρε τὰ παρόντα , καὶ τοὺς προγόνους ἐπῄνεσεν , καὶ μετεωρίσας καὶ φυσήσας ὑμᾶς κατέβη .”
13.11
13.12
Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
<<Dem. 13.9 | Dem. 13.11 (English) | >>Dem. 13.14 |